E toe lua vaiaso o loo totoe ona talimalo lea o le faalapotopotoga Soka a Samoa ile taamilosaga a alii lalo ifo ole 19 tausaga le matutua.
O le uluai aso o le masina o Setema ua mautinoa olea tatala aloaia ai lea taamilosaga ile taaloga muamua a Solomona ma le au a PNG, sosoo ai ma le taaloga muamua a Samoa ile itula e 4 ile afiafi ole aso lava lea.
E valu atunuu ua saofaga mai lenei taamilosga, e aofia ai Solomona, Papua Niu Kini, New Caledonia, Samoa, Fiti, Vanuatu, Niu Sila, ma Tahiti.
Ua amata tapenaga a le aufaigaluega o le Asosi Soka i vaega masani lava e manaomia i taimi o ana taligamalo o taamilosaga taitasi.
E aofia ai, auala o femalagaina, o fale talimalo olea nofoia e au taitasi, ae sili ai o le mautinoa o le malu puipuia o alo ma fanau o au taitasi.
O aso tofi taitasi o vaiaso uma e faatino ai fonotaga ma sui o le Oceania i luga o upega tafailagi mo le faamausali atili o tapenaga mo lea lava faamoemoe.
Ma o le aso 14 o le masina fou ua faamoemoe e faamaea aloaia ai lenei taamilosaga i le malae soka a Samoa i Tuanaimato.
